დავით ყიფიანი (დ. 18 ივნისი, 1951, თბილისი — გ. 17 სექტემბერი, 2001) – ფეხბურთელი, თამაშობდა ნახევარმცველის პოზიციაზე. იყო თბილისის „დინამოსა“ და საბჭოთა კავშირის ნაკრების წევრი. მოგვიანებით თბილისის „დინამოს“ მწვრთნელი. დავით ყიფიანი დაიბადა 1951 წლის 18 ივნისს. ფეხბურთის თამაში დაიწყო 35-ე სკოლაში. 1970 წელს თამაშობდა თბილისის „ლოკომოტივში“, ხოლო 1971—1982 წლებში – თბილისის „დინამოში“. გამოდიოდა საბჭოთა კავშირის ნაკრებში. სსრკ უმაღლეს ლიგაში ჩაატარა 245 მატჩი, გაიტანა 78 გოლი; სსრკ-ს ნაკრებში — 19 მატჩი, 7 გოლი; ევროტურნირებზე — 35 მატჩი, 16 გოლი. სულ ოფიციალურ შეხვედრებში გატანილი აქვს 106 გოლი. წვრთნიდა საქართველოს ნაკრებს. დაიღუპა ავტოავარიაში, 2001 წლის 17 სექტემბერს. დაკრძალულია საბურთალოს სასაფლაოზე, ამაღლების ეკლესიის მარჯვნივ.
