გიორგი დავითაშვილი (დ. 15 თებერვალი, 1893, ბათუმი — გ. 4 ივლისი, 1966, თბილისი) – მსახიობი, საქართველოს სახალხო არტისტი, სსრკ სახელმწიფო პრემიის ლაურეატი. 1913 წელს დაამთავრა ბათუმის გიმნაზია და სწავლა განაგრძო პეტერბურგის ა. პეტროვსკის სასცენო ხელოვნების სკოლაში. 1915-1918 წლებში მუშაობდა ტაგანროგის თეატრში. 1918 წელს დაბრუნდა ბათუმში, ხოლო მომდევნო წელს მოღვაწეობდა თბილისის რუსულ თეატრში. 1920 წლიდან ქართულ თეატრშია. რუსთაველის თეატრის სცენაზე შექმნა 80-მდე როლი. დაკრძალულია მწერალთა და საზოგადო მოღვაწეთა დიდუბის პანთეონში.
